Әлеуметтік желілерде Алматы көшелерін су басқан сәттердің бейнежазбалары таралып жатыр. Кадрлардан жаңбыр суының жолдарды, тротуарлар мен жаяу жүргіншілер өткелдерін басқанын көруге болады.
Әсіресе Абай даңғылы мен Жароков көшесінің қиылысында жағдай күрделене түскен. Жиналған су «Алатау» метро бекетіне түсетін баспалдақпен төмен қарай ағып, жолаушылардың кіріп-шығуына уақытша кедергі келтірген.
Метрополитен өкілдері су басуға қалалық су бұру жүйесінің шамадан тыс толуы себеп болғанын түсіндірді. Қызметкерлер суды сорып, аумақты тазалауға кіріскен.
Соған қарамастан, «Алатау» бекеті қалыпты жұмысын жалғастырған. Пойыздардың қозғалысы тоқтатылмаған.
Әкімдік мәліметінше, түнде Алматыда шамамен 36 миллиметр жауын-шашын түскен. Нөсердің салдарын жою үшін коммуналдық қызметтер күшейтілген жұмыс тәртібіне көшті. Қалада 85 бригада мен жүздеген арнайы техника жұмылдырылған.
Кейінірек метро бекетінің кіреберісіне жиналған су толық сорылғаны белгілі болды.
Алайда қала тұрғындары су басқан көшелердің бейнежазбаларын жариялауды жалғастырып жатыр. Олардың айтуынша, кейбір жолдар жөнделіп, арықтар жабылғаннан кейін жаңбыр суы бұрынғыдай ағып кетпейтін болған.
Ал су басқан жолдармен жүрген көліктер жаяу жүргіншілерге су шашып, онсыз да қиын жағдайды ушықтырған.
