Ақтаудан әскерге шақырылған 18 жастағы Еркебұлан Досымбет Ақтөбе облыстық ауруханасына түсті. Ол әскери бөлімде өзін бірнеше рет үш сержант ұрып-соққанын айтып, полицияға арыз жазған деп хабарайды Lada.kz.
Еркебұлан №6655 әскери бөлімінде мерзімді әскери қызмет атқарып жүрген. Оның айтуынша, сержанттар оны бірнеше рет ұрып, шап тұсына да соққы жасаған.
Сарбаздың денсаулығына байланысты мәселелер әскерде жүрген кезінде басталған. Оның айтуынша, шамамен екі тәулік бойы зәр шығара алмаған. Қазір оған катетер қойылды.
Дәрігерлер алдымен оның жағдайын тексерді. Кейін травматолог, зәр шығару жүйесіндегі мәселелер жарақат салдарынан болуы мүмкін деген болжам айтты. Дәрігермен сөйлесу кезінде Еркебұлан әскери бөлімде соққыға жығылғанын айтып берген. Осыдан кейін медицина қызметкері полиция шақырған. Сарбаз құқық қорғау органдарына арыз жазды.
Жас сарбаздың анасы Гүлдана Кетибаева ұлын ауруханада көрген кезде қатты өзгеріп кеткенін айтқан.
«Көзі шүңірейіп кеткен, сақал-мұрты өсіп кеткен, қатты арықтап кетіпті. Киімі — қоқыстан тауып алғандай: бәрі лас. Тіпті ауыстыратын киімін де алып келмеген. Физикалық та, эмоционалдық та жағдайы өте ауыр», — деді сарбаздың анасы.
Гүлдана Кетибаеваның сөзінше, әскери прокуратура Қазақстан Республикасы Қылмыстық кодексінің 451-бабы 1-бөлігі — «Билiктi немесе қызметтiк өкiлеттiктердi асыра пайдалану» бойынша қылмыстық іс қозғалған.
Әлеуметтік желілерде әскери қызметшінің киім үлгісіне қатысты фото және бейнематериалдардың таралуына байланысты ҚР Ұлттық ұланының «Батыс» өңірлік қолбасшылығының баспасөз қызметі түсініктеме берді.
Ведомствоның мәліметінше, әскери қызметші таңертең Ақтөбе қаласындағы медициналық орталыққа жеткізілген. Күн ішінде оған қажетті заттай мүлік беріліп, кешке қарай таза әрі жарамды әскери киім жиынтығы табысталған.
«Қазіргі уақытта ол белгіленген заттай жабдықтау нормаларына сәйкес қажетті әскери киім-кешекпен толық қамтамасыз етілді», — деп хабарлады ҚР Ұлттық ұланының «Батыс» өңірлік қолбасшылығының баспасөз қызметі.
Ұлттық ұлан өкілдері әлеуметтік желіде тараған фото және бейнематериалдардың әскери қызметшінің бөлімге келгеннен кейін бірден түсірілгенін атап өтті.
«Әлеуметтік желілерде тараған материалдар әскери бөлімге келгеннен кейін бірден түсірілген», — деп хабарлады баспасөз қызметі.
Оқиғаның мән-жайы мен әскери қызметшілердің әрекетіне тиісті тексеру аясында құқықтық баға беріледі.
