Қазақстан ІІМ басшысы «Орталық Азия – Қытай» форматындағы ішкі істер және қоғамдық қауіпсіздік органдары басшыларының кездесуіне қатысты. Тараптар есірткінің заңсыз айналымына, трансұлттық қылмысқа, киберқылмысқа және өзге де заманауи қауіп-қатерлерге қарсы іс-қимыл мәселелерін талқылады.
Ержан Сәденов Қытайдың Қоғамдық қауіпсіздік министрі Ван Сяохунмен жеке келіссөз өткізді. Кездесу қорытындысында тараптар «Қорғас» шекара маңы ынтымақтастығы халықаралық орталығының аумағында қауіпсіздік пен құқықтық тәртіпті қамтамасыз ету туралы келісімге қол қойды.
Құжат Қазақстан мен Қытайдың құқық қорғау органдары арасындағы өзара іс-қимыл тәртібін айқындайды. Бұл ақпарат алмасуды жеделдетуге, ықтимал қауіптерге дер кезінде ден қоюға және орталық аумағындағы құқық бұзушылықтардың алдын алуға мүмкіндік береді деп күтіледі.
Сонымен қатар екі ел ұлттық жүргізуші куәліктерін өзара тану және айырбастау жөнінде уағдаласты. Жаңа шара Қазақстан мен Қытай азаматтары үшін тиісті рәсімдерді жеңілдетіп, екі ел арасындағы сапарларды қолайлы етуге бағытталған.
