Қазақстанда жұмыс күшіне сұраныс жоғары болғанымен, жұмыс берушілер қажетті мамандарды бірден таба алмауда. Премьер-министр Олжас Бектенов халықты бос жұмыс орындары туралы кеңінен ақпараттандыру қажет екенін айтты.
Оның айтуынша, бүгінде Қазақстанда 1 миллионға жуық бос жұмыс орны бар.
Еңбек министрі Асқарбек Ертаевтың мәліметінше, жыл басынан бері жұмыс берушілер Электрондық еңбек биржасына 845 мың бос жұмыс орнын жариялаған. Оның 432 мыңнан астамы жұмысшы мамандықтарға тиесілі.
Сонымен қатар бос жұмыс орындарының шамамен 30–40 пайызы бойынша жұмыс берушілер лайықты маман таба алмай отыр. Кадр тапшылығына байланысты компаниялар шетелден мамандар тартуға мәжбүр.
Олжас Бектенов елде жұмыс істеуге ниетті азаматтар үшін мүмкіндік жеткілікті екенін атап өтті.
«Жұмыс істегісі келген адамға жұмыс табылады деген сөз бе? Жұмыс тоқтап қалмауы үшін біз шетелден мыңдаған маман тартуға мәжбүрміз», — деді Премьер-министр.
Үкімет басшысы бұл ақпаратты халыққа жеткізуді тапсырды. Сондай-ақ Қазақстанда «жұмыс жоқ» деген сөз болмауы керек екенін атап өтті.
