Жол-көлік оқиғасы Әл-Фараби даңғылының бойындағы тоннель алдындағы жолдың астында болған.
BMW шығыс бағытта келе жатқан. Жүргізуші көлікті кері бағытқа бұру кезінде рөлге ие бола алмай қалған.
Көлік алдымен жол жиегіндегі бордюрге, кейін бетонға соғылып, аударылған. Соққыдан кейін BMW жол бойымен шамамен 10 метр сырғанаған.
Көліктің ішінде екі жас жігіт пен бір қыз болған. Үшеуін де жедел жәрдем қызметкерлері тексерді. Оларға медициналық көмек көрсету және ауруханаға жатқызу қажет болмаған.
Ең қызығы, құны 40 млн теңгеге жуық BMW дәл сол күні сатып алынған. Жаңа көлікпен алғашқы сапар жол апатымен аяқталды.
Апат салдарынан Әл-Фараби даңғылында екі бағытта да көлік қозғалысы қиындады. Бір бағытта жолдың бір бөлігі жабылса, екінші бағытта апатқа қызыққан жүргізушілердің баяу қозғалуынан кептеліс пайда болды.
Оқиға орнына жол полициясы қызметкерлері келген.
