Кассациялық сот Орал қаласының тұрғынына қатысты үкімді өзгеріссіз қалдырды. Ол танысының денсаулығына қасақана ауыр зиян келтіргені үшін бес жылға бас бостандығынан айырылған.
Оқиға сотталған азаматтың пәтерінде болған. Ер адам мас күйінде танысына пышақпен кемінде 10 рет соққы жасаған. Жәбірленушінің басы, кеуде тұсы, іші, арқасы мен саны жарақаттанған. Жарақаттар мен қан кету оның өміріне қауіп төндірген.
Кассациялық шағымында сотталған азамат өзіне жасалған шабуылдан қорғанғанын айтқан. Алайда сот бұл уәжді негізсіз деп таныды.
Сот анықтағандай, жәбірленуші оған шабуыл жасамаған әрі қарсылық көрсетпеген. Бұл сараптама қорытындыларымен, куәгерлердің жауаптарымен, сондай-ақ оқиға орнынан табылған пышақ пен қан іздері арқылы расталған.
Кассациялық сот та тағайындалған жазаны заңды әрі істің мән-жайына сай деп танып, бұған дейінгі сот шешімдерін өзгеріссіз қалдырды.
