Таяу Шығыстағы қақтығыстың қайта күшеюі әлемдік мұнай нарығына әсер етіп, Brent маркасының бағасын барреліне 100 доллардан жоғары көтерді. Бұл көрсеткішке мұнай бағасы шілде айынан бері алғаш рет жетіп отыр.
9 қыркүйекте Brent фьючерстері 100 долларлық межеден асып, бір сәтте 100,95 долларға дейін көтерілді. Ал WTI мұнайының бағасы 95 доллардан асты.
Нарықтағы өсімге АҚШ пен Иран арасындағы шиеленістің күшеюі және аймақтағы мұнай тасымалына қатысты қауіптің артуы себеп болып отыр. Иранға жақтас хуситтердің Сауд Арабиясындағы энергетикалық нысандарға жасаған шабуылдары да мұнай инфрақұрылымының қауіпсіздігіне алаңдаушылық туғызды.
Сонымен қатар Ормуз бұғазындағы жағдай күрделене түсті. Бұл бағыт арқылы әлемдік мұнай жеткізілімінің елеулі бөлігі өтеді. Қазір бұғаз арқылы тасымал көлемінің айтарлықтай төмендеуі жаһандық нарықтағы ұсынысқа қатысты қауіптерді күшейтіп отыр.
Сарапшылардың пікірінше, Таяу Шығыстағы қақтығыс ұзаққа созылып, мұнай жеткізіліміне кедергі күшейсе, баға одан әрі өсуі мүмкін.
