Threads желісінде қолданушылар ерекше кездесулері туралы талқылай бастады. Кейбір оқиғалар расымен де тосын болып шыққан.
Қазақстандықтардың бірі алғашқы кездесуден кейін қыздың екінші рет кездесуді өзі ұсынғанын айтып берді. Алайда ол кездесуге Алматыдағы «Кеңсай-1» зиратын таңдаған. Жұп Дінмұхамед Қонаевтың қабірін көруге барған.
Жазбаға пікір білдірген қыздардың бірі жасөспірім кезінде өзіне әнші Мақпал Жүнісованың үйін көруге баруды ұсынғанын еске алды. Жас жігіт қандай да бір жолмен оның мекенжайын біліп, екеуі қаланың бір шетінен екінші шетіне дейін барып, үйді ұзақ іздеген.
«Ол кезде оның үйі өте әдемі әрі бай көрінетін. Біз тұрып, үйіне қарап, қызығатынбыз. Оның үстіне, ол жерде Мақпал Жүнісованың өзі тұратынына таңғалатынбыз. Қақпалары да өте әдемі болғаны есімде. Әрине, ішке кірген жоқпыз, бізді кім кіргізсін», – деп еске алады автор.
Ал ең тосын оқиғалардың бірі танысу сайтында бір ер адаммен танысқан қызға тиесілі. Ер адам кездесуге қара түсті көлікпен және қызыл раушан гүлімен келген. Алайда кездесуден кейін қыз оның бойының аласа екенін білген. Бұл туралы ер адам алдын ала айтпаған.
«Қолдары да кіп-кішкентай екен. Оның көлік жүргізгені қызық көрінді, рөлге әрең жетіп отырды», – деп еске алады қыз.
Жұп кафеге барған, кейін ер адам қызды үйіне жеткізіп салған. Ал түнде ол күтпеген жерден қоңырау шалып, түнеп шығуға рұқсат сұраған. Айтуынша, көлігін соғып алған және әкесінің реакциясынан қорқыпты. Қыз оған бас тартып, кейін бұғаттап тастаған.
Тағы бір ерекше кездесу Алматыдағы «Алматы жылу жүйелері» мекемесінде жұмыс ауысымы кезінде өткен. Ол кездесу түнеп шығумен аяқталған.
Қыздардың бірі Париждегі зиратта болған кездесуі туралы айтып берді. Онда Оскар Уайльд, Шопен, Бальзак және басқа да танымал тұлғалар жерленген. Бұған тағы бір қолданушы қосылып, Санкт-Петербургте құрбыларымен бірге Чайковскийдің қабірін көруге барғанын еске алды.
Бірі шипажайда оттегі коктейлін ішкенін еске алса, енді бірі үшеуі болып кездескенін айтып берді. Сол кезде көлік терезесінен жігіттің анасы оларды екі сағаттан астам уақыт бойы бақылап отырған.
