Непалда 11 қазанда болған жойқын су тасқынынан ондаған үй мен бірнеше көпір қирады. Бес адам із-түзсіз жоғалып, 49 тұрғын құтқарылды.
Табиғи апат Катмандудан шамамен 100 шақырым жерде орналасқан Горкха округінде болды. Ірі көшкін салдарынан Будхи-Гандаки өзенінің арнасы бөгеліп, жиналған су кейін елді мекендерге лап қойған. Қатты ағыс жолындағы ғимараттар мен инфрақұрылым нысандарын қиратып кеткен.
Associated Press агенттігінің мәліметінше, тасқын 36-ға жуық үй мен төрт көпірді бұзған. Сондай-ақ су электр станциясының құрылыс алаңы, электр желілері мен байланыс жүйелері зақымданды. Хабар-ошарсыз кеткендердің екеуі әйел, үшеуі ер адам.
Жергілікті билік өзен жағалауындағы елді мекендердің тұрғындарын қауіпсіз жерге көшуге шақырды. Құтқару жұмыстарына әскерилер, полиция қызметкерлері мен тікұшақтар жұмылдырылды. Алғашқы мәлімет бойынша, қаза тапқандар туралы ақпарат түспеген.
Бұған дейін SHYNDYK.KZ Непал мен Тибетте тамыз айында болған басқа табиғи апаттан кейін Қазақстанның екі азаматы із-түзсіз жоғалғанын жазған еді. Бастапқыда үш қазақстандық әйелмен байланыс үзілгені хабарланған. Кейін олардың бірінің сапардан бас тартып, Қазақстанда қалғаны анықталды.
8 қазанда Қазақстан Сыртқы істер министрлігі қалған екі әйелдің қайда екені әлі белгісіз екенін мәлімдеді. Олардың туыстары ДНҚ сараптамасы үшін биологиялық үлгілер тапсырған. Непалдағы іздестіру-құтқару операциясы 5 қазанда аяқталғанымен, Қытайдың Тибет автономиялық ауданында іздеу жұмыстары жалғасып жатқан.
