Депутат Асхат Рахымжанов қазақстандықтардың АИ-95 және АИ-98 бензинінің сапасына қатысты шағымдарына байланысты Үкіметке депутаттық сауал жолдады.
Оның айтуынша, жанармай құйғаннан кейін жүргізушілер форсункалар, оталдыру шамдары, катализаторлар және басқа да көлік бөлшектерінің істен шығуына байланысты шағымдарын білдірген. Кей жағдайларда жөндеу құны 200–600 мың теңгеге дейін жетеді.
2026 жылы жүргізілген тексерулер барысында отынды алмастыру фактілері анықталған. Алматыда АИ-100 маркасымен құрамындағы күкірт мөлшері үш еседен астам жоғары өнім сатылған. Ал Қызылорда облысында АИ-95 маркасымен АИ-92 бензині сатылған.
Депутат отын сапасын өндіру мен импорттан бастап, сақтау және сатуға дейінгі барлық кезеңде бақылауды күшейту қажет деп санайды.
Ұсыныстар қатарында ЖҚС мен мұнай базаларын тосын тексеру, отынның әр партиясын цифрлық қадағалау, сондай-ақ тұтынушыларға бензиннің шығу тегін және зертханалық тексеру нәтижелерін білуге мүмкіндік беретін QR-кодтарды енгізу бар.
Сонымен қатар сапасыз отынды сатқаны үшін жауапкершілікті күшейту, заң бұзушылықтардың ашық тізімін құру және жанармай құйғаннан кейін көлігіне зақым келген автокөлік иелерінің өтемақы алуын жеңілдету ұсынылды.
