Экс-депутат, қоғам қайраткері Мұрат Әбенов PISA-2025 халықаралық зерттеуінің қорытындысынан кейін Қазақстандағы мектеп білімінің жай-күйіне баға берді. Айтуынша, көрсеткіштердің төмендеуі қазіргі білім беру жүйесінде шешімін таппаған мәселелердің бар екенін көрсетеді.
«PISA-2025 нәтижесі күтпеген жағдай емес. Біз бағытымызды өзгерткен жоқпыз. Сапа төмендеуде және одан сайын жылдам құлдырап барамыз. Ешқандай ғажайып болған жоқ», — деді Әбенов.
Ол білім сапасын арттыру үшін шалғай ауылдардағы мектептердің жағдайына ерекше назар аудару қажет деп санайды. Әбеновтің пікірінше, ауылдарда заманауи, қажетті құрал-жабдықпен толық қамтамасыз етілген мектептерді көбірек салу керек. Мұндай білім ордаларына балаларды іріктеусіз қабылдауды ұсынды.
«Бұл тәсіл білім сапасын жаппай жақсартуға мүмкіндік береді», — деп жазды ол.
Қоғам қайраткері білім беру саласындағы мемлекеттік бақылау мен жауапкершілік мәселесін де көтерді. Оның пікірінше, білім саласын жеке пайда табудың көзіне айналдыруға жол бермеу керек.
Әбенов өз жазбасында Оқу-ағарту министрлігінің Қаржы орталығына да тоқталып, жүздеген миллиард теңгенің жымқырылғанын мәлімдеді. Алайда ол бұл туралы нақты деректер мен құжаттар келтірмеді.
«Мектеп — базар емес. Білім сапасына қатаң мемлекеттік аудит жүргізілмесе, сәтсіз реформалар үшін шенеуніктер жеке жауапкершілікке тартылмаса және білімге қойылатын негізгі талаптар қайта енгізілмесе, біздің болашағымыз бұлыңғыр», — деді Әбенов.
Ол жазбасының мақсаты тек сын айту емес екенін атап өтті. Ол білім беру саласындағы мәселелерді түсініп, жағдайды өзгертуге өз үлесін қосқысы келеді.
Әбенов өзін мұғалімнің баласы екенін, өзі де мектепте сабақ бергенін және әр жылдары білім беру саласында түрлі қызмет атқарғанын айтты. Биыл ол Оқу-ағарту министрлігінің Қоғамдық кеңесінің төрағасы болып сайланған.
Сонымен қатар ол қоғамдық өкілеттігі аясында Оқу-ағарту министрі Жұлдыз Сүлейменоваға білім беру жүйесіндегі жағдайды жақсарту жұмыстарына қолдау көрсетуге ниетті екенін жеткізді.
Сондай-ақ Мұрат Әбенов Kun.KZ сараптамалық платформасында білім беру мәселелерін талқылауға арналған подкасттар сериясын бастауды жоспарлап отырғанын хабарлады. Подкастқа осы тақырыпқа қызығушылық танытқан азаматтарды шақырып, нақты ұсыныстарды бірге талқылауды көздеп отыр.
