Ұлттық спорт түрлерін дамыту Үкімет пен әкімдіктердің маңызды міндеттерінің бірі болып қала беруі керек. Бұл туралы Қазақстан Президенті Қасым-Жомарт Тоқаев мәлімдеді.
Мемлекет басшысының айтуынша, бүгінде ұлттық спорт саласында 30-дан астам мамандандырылған мекеме жұмыс істейді. Астанада Ұлттық спорт университеті ашылып, Ұлттық және ат спорт түрлері орталығы өз жұмысын бастады.
Қазақстанда жыл сайын қазақ күресі, тоғызқұмалақ, асық ату, көкпар, бәйге және басқа да ұлттық спорт түрлерінен мыңнан астам жарыс өткізіледі. Сонымен қатар ұлттық спорт түрлерінің фестивалі, «Ақ бидай» ауыл ойындары және «Қазақстан барысы» турнирі тұрақты түрде ұйымдастырылады.
Тоқаев ұлттық спорт түрлерінің заң жүзінде олимпиадалық спорт түрлерімен теңестірілгенін атап өтті.
Президент қазақстандық спортшылардың халықаралық аренадағы жетістіктеріне де тоқталып, жуырда әлемнің бірінші ракеткасы атанған Елена Рыбакинаның нәтижесін ерекше атап өтті.
«Бүгінде қазақ спортының беделі бұрын-соңды болмаған деңгейде жоғары, мұны бүкіл әлем мойындап отыр. Біздің спортшылар әрдайым үздіктер қатарында», – деді Президент.
Тоқаев алда Қазақстанда ірі халықаралық жарыстар өтетінін айтты. Келер жылы Астана жеті әлем чемпионатын қабылдаса, 2029 жылы Алматыда X Қысқы Азия ойындары өтеді.
Мемлекет басшысы спортшылардың жетістіктері жастарға үлгі болып, оларды тек табандылық пен тәртіпке ғана емес, жоғары мәдениет пен тәрбиелілікке де баулуы керектігін атап өтті.
