Мемлекет басшысы қазақстандық спортшылардың 100-ден астам елдің өкілдері қатысқан жарыста лайықты өнер көрсеткенін атап өтті. Оның айтуынша, ұлттық құрама жоғары шеберлік танытып, Қазақстанның ұлттық спорт түрлеріндегі беделін нығайтты.
«Ұлттық құрамамыз отандастарымыздың үмітін толық ақтады деп нық сеніммен айта аламын. Мемлекет басшысы ретінде бүкіл Қазақстанға рух берген жеңістеріңіз үшін баршаңызға зор ризашылығымды білдіремін», — деді Тоқаев.
Президент құрама спортшыларының өнерін бүкіл ел бақылағанын айтты. Жанкүйерлер оларға қолдау білдіріп, әр жарыстың нәтижесіне алаңдады. Ал жалпы есептегі жеңіс барша қазақстандықтың ортақ мақтанышына айналды.
Тоқаев команданың нәтижесін мықты мінез бен жеңіске деген жігердің көрінісі деп бағалады. Ол спорттың басты міндеттерінің бірі өзара құрмет пен қолдау мәдениетін қалыптастыру және халықтар арасындағы достықты нығайту екенін атап өтті.
Мемлекет басшысы жарыстың жоғары деңгейде ұйымдастырылғанына және нәтижелердің әділ болғанына да тоқталып, Қырғызстан Президентіне алғыс білдірді.
