Жетісу облысындағы «Көктал» полигонында Ұжымдық қауіпсіздік туралы шарт ұйымына (ҰҚШҰ) мүше елдердің әскери контингенттері қатысатын «Шеп-2026» оқу-жаттығуының белсенді кезеңі басталды.
Биылғы оқу-жаттығуға Қазақстан, Қырғызстан, Ресей және Тәжікстанның әскери қызметшілері қатысып отыр. Маневрлер барысында әскерлердің бірлескен әрекеті, басқару органдарының үйлесімді жұмысы және ұлттық контингенттер арасындағы өзара іс-қимыл пысықталады.
Жаттығуға шамамен 1,5 мың әскери қызметші мен 300-ден астам қару-жарақ, әскери және арнайы техника жұмылдырылған. Олардың қатарында 115 ұшқышсыз ұшу аппараты бар.
Практикалық кезең таулы-шөлейт аймақтың ерекшеліктерін ескере отырып ұйымдастырылған. Әскери бөлімдермен қатар Қазақстанның Шекара қызметі мен Ұлттық ұланының бөлімшелері де оқу-жаттығуға қатысып, бірлескен іс-қимылдарды пысықтайды.
«Шеп-2026» оқу-жаттығуы 13-18 қыркүйек аралығында өтеді. Оған Қазақстан Қарулы күштері Десанттық-шабуылдау әскерлерінің қолбасшысы, полковник Мақсұт Гусейнов басшылық етеді.
Оқу-жаттығудың ашылу рәсіміне ҰҚШҰ Бас хатшысының орынбасары Мирлан Тұрғынбеков, ҚР Қарулы күштері Бас штабы бастығының орынбасары, генерал-майор Асқар Жоламанов, ҰҚШҰ Біріккен штабы бастығының орынбасары, генерал-лейтенант Руслан Шпекбаев және басқа да лауазымды тұлғалар қатысты.
«Шеп» оқу-жаттығуы жыл сайын өткізіледі. Оның негізгі мақсаты – Орталық Азия өңірінің Ұжымдық жедел өрістету күштерінің өзара іс-қимылын жетілдіру және бірлескен міндеттерді орындауға дайындығын арттыру.
