Сеулде Президент Қасым-Жомарт Тоқаев Корея Республикасының мемлекет және қоғам қайраткерлерін II дәрежелі «Достық» орденімен марапаттады. Салтанатты рәсімде Мемлекет басшысы екі ел арасындағы стратегиялық серіктестік пен гуманитарлық байланыстың дамуына тоқталды, деп хабарлайды SHYNDYK.KZ.
Президенттің айтуынша, Қазақстан мен Оңтүстік Корея сауда-экономикалық ынтымақтастықты кеңейтіп келеді. Екі ел машина жасау, энергетика, металлургия және озық технологиялар салаларында бірлескен жобаларды жүзеге асырып жатыр.
«Корея Республикасы — Қазақстанның стратегиялық серіктесі. Біз Кореяны халықаралық аренада беделі жоғары мемлекет деп білеміз. Екі ел арасындағы жан-жақты ынтымақтастық жыл сайын нығайып келеді», — деді Қасым-Жомарт Тоқаев.
Мемлекет басшысы Қазақстандағы корей қауымдастығының рөліне де ерекше назар аударды. Ол елімізде тұратын 100 мыңнан астам корей ұлты өкілінің Қазақстанның экономикалық және қоғамдық-саяси дамуына үлес қосып, қоғам бірлігін нығайтып отырғанын атап өтті.
Президент корей мәдени орталықтарының, Алматыдағы Мемлекеттік республикалық академиялық корей музыкалық комедия театрының және корей тілінде хабар тарататын бұқаралық ақпарат құралдарының жұмысын да атап өтті.
Тоқаев мемлекеттік наградалардың табысталуын қазақ халқының құрметі мен ризашылығының белгісі деп атады. Оның айтуынша, Қазақстан мен Корея арасындағы достықты нығайту екі елдің де мүддесіне сай келеді.
