Қазақстан Президенті Қасым-Жомарт Тоқаев Оңтүстік Кореяның Hanwha Group компаниясы төрағасының орынбасары Ким Дон Вонмен кездесті. Тараптар Қазақстан мен Корея арасындағы инвестициялық және технологиялық ынтымақтастықты кеңейту перспективаларын қарастырды.
Кездесу барысында Қасым-Жомарт Тоқаев Hanwha Group компаниясының стратегиялық маңызы бар салалардағы қызметіне тоқталып, Қазақстан мен Оңтүстік Корея арасындағы серіктестіктің маңызын атап өтті.
Әңгіме барысында цифрлық инфрақұрылымды дамыту және жасанды интеллект саласындағы жобаларға ерекше назар аударылды. Президент Қазақстанда жасанды интеллектінің ұлттық экожүйесін қалыптастыру бағытында қолға алынған жұмыстар туралы айтып берді.
Мемлекет басшысы Hanwha Group компаниясын Қазақстанда бірлескен жобаларды жүзеге асыруға шақырды. Қасым-Жомарт Тоқаев Қазақстанды компанияның Орталық Азия нарығына шығуына мүмкіндік беретін технологиялық алаң ретінде пайдалануға болатынын атап өтті.
Өз кезегінде Ким Дон Вон Hanwha Group-тың Қазақстанмен ынтымақтастығының тарихы ұзақ екенін айтты. Оның мәліметінше, компания Қазақстанмен серіктестікті 1997 жылы бастаған.
Hanwha Group өкілі компанияның Қазақстандағы цифрландыру үдерістеріне қатысуға және бірлескен жобаларды жүзеге асыруға қызығушылық танытып отырғанын жеткізді.
Кездесу барысында сондай-ақ Оңтүстік Корея бизнесінің Қазақстандағы қатысуын кеңейту және жаңа бірлескен бастамаларды іске асыру мүмкіндіктері талқыланды.
