Қазақстанда шығарылған стейблкоиндерді тауарлар мен қызметтерге ақы төлеуге, экспорттық-импорттық операциялар мен трансшекаралық ақша аударымдарына пайдалану жоспарланып отыр. Бұл туралы Үкімет отырысында Ұлттық банк төрағасы Тимур Сүлейменов мәлімдеді.
Бұл шаралар Президенттің цифрлық активтер индустриясын дамыту жөніндегі 2026 жылғы 7 шілдедегі Жарлығын іске асыру аясында қарастырылған. Негізгі міндеттер қатарында операцияларды реттелетін ортаға көшіру, токендеу мен жаңа төлем құралдарын дамыту және инвесторларды қорғауды күшейту бар.
Сонымен қатар лицензиясы бар провайдерлердің мүмкіндіктерін кеңейтіп, арнаулы салық режимін енгізу жоспарланған. Ұлттық банктің бағалауынша, отандық стейблкоиндерді қолдану есеп айырысуды жеделдетіп, бизнестің шығындарын азайтуға мүмкіндік береді.
Ұлттық банк жанынан Цифрлық активтер және төлем жүйелері комитеті де құрылады.
2026 жылдың соңына дейін екі токендеу жобасын іске қосу көзделген. Iconic Tower кешені бойынша жобаның көлемі 50 млн долларға дейін, ал Birlik логистикалық орталығы бойынша 10 млн долларға дейін жетеді.
Жобалар Ұлттық банктің реттеуші құмсалғышы мен Қазақстан қор биржасының KASE инфрақұрылымы арқылы жүзеге асырылады.
