Hotel Lotte Co. Ltd және Sensata Invest Алматы мен Alatau City-де қонақүйлер салу жөніндегі өзара түсіністік туралы меморандумдармен алмасты. Құжаттар Президент Қасым-Жомарт Тоқаев пен Lotte Group төрағасы Шин Дон Биннің кездесу қорытындысында рәсімделді, деп хабарлайды SHYNDYK.KZ Ақордаға сілтеме жасап.
Кездесуде компанияның Қазақстандағы инвестициялық жобаларын кеңейту мәселесі талқыланды. Мемлекет басшысы Lotte компаниясының екі ел арасындағы экономикалық ынтымақтастықты дамытуға қосқан үлесін және Қазақстан нарығындағы көпжылдық қызметін атап өтті.
Тараптар тамақ өнеркәсібіндегі ынтымақтастыққа ерекше назар аударды. Президент «Рахат» брендінің дамуына, сондай-ақ Алматы мен Шымкенттегі өндіріс орындарының жаңғыртылуына тоқталды.
Сонымен қатар Lotte Global Logistics компаниясының көлік-логистика инфрақұрылымын кеңейту және өңірлік әрі халықаралық нарықтарға шығу жоспары сөз болды.
Қасым-Жомарт Тоқаев Алматыда алғашқы Lotte қонақүйін салу жөніндегі келісімді құптады. Шин Дон Бин компанияның тамақ өнеркәсібіне, логистика мен қонақүй бизнесіне инвестиция салуға ниетті екенін растады.
Lotte Group Alatau City қаласын дамыту жобаларына, соның ішінде Iconic Complex кешенін құруға да қатысуды жоспарлап отыр.
