Қасым-Жомарт Тоқаев Қазақстанды толық өндірістік цикл қалыптасқан, автомобиль өндіретін және экспорттайтын ірі өңірлік орталыққа айналдыру міндетін белгіледі. Бұл туралы Президент Hyundai Motor Group компаниясының президенті әрі Стратегия және жоспарлау бөлімінің басшысы Сунг Киммен кездесуде айтты, деп хабарлайды SHYNDYK.KZ Ақордаға сілтеме жасап.
Мемлекет басшысы өндірісті жергіліктендіру деңгейін арттыру, автокөлік бөлшектерінің шығарылымын кеңейту және саланың экспорттық әлеуетін күшейту қажеттігін атап өтті. Осы орайда ол Алматыдағы Hyundai және Қостанайдағы Kia зауыттарының рөліне ерекше тоқталды.
Қасым-Жомарт Тоқаев электр көлігін ынтымақтастықтың тағы бір перспективалы бағыты ретінде атады. Бұл бағыт электромобильдер мен олардың бөлшектерін өндіруді, сондай-ақ қуаттау инфрақұрылымын қалыптастыруды қамтуы мүмкін.
Сунг Ким топтың Қазақстандағы қызметін кеңейтіп, өндірісті жергіліктендіруді тереңдетуге ниетті екенін растады. Оның айтуынша, компания Қазақстанды ТМД аумағындағы қызметінің маңызды өңірлік орталығы ретінде қарастырады.
Кездесуге Kia және Hyundai Engineering компанияларының өкілдері де қатысты. Kia қазақстандық ұлттық автомобиль брендін бірлесіп дамытуға ниетті екенін мәлімдеді. Ал Hyundai Engineering мұнай-газ саласында, өнеркәсіп пен инфрақұрылым бағытында ынтымақтасуға дайын екенін білдірді.
Кездесу қорытындысында QazaqGaz, Hyundai Engineering және SICIM Kazakhstan Батыс Қазақстанда газ өңдеу зауытын салу жөніндегі келісімдермен алмасты. Сонымен қатар Hyundai Motor Company мен Astana Motors жаңа Hyundai Tucson моделін өндіру туралы келісім алмасты.
