Премьер-министр Олжас Бектенов экономикаға қосымша капитал тарту үшін нақты активтерді токендеу тетігін белсенді дамытуды тапсырды. Ұлттық банк бірінші кезекте цифрлық форматқа көшірілетін активтердің тізімін анықтауы керек, деп хабарлайды SHYNDYK.KZ Үкіметке сілтеме жасап.
Үкімет отырысында Олжас Бектенов цифрлық активтер нарығын дамытуға қажетті бастапқы жағдай жасалғанын атап өтті. Ендігі міндет — инвестициялар мен жаңа технологияларды тартуға және қаржы секторының бәсекеге қабілеттілігін арттыруға мүмкіндік беретін біртұтас экожүйе қалыптастыру.
Премьер-министр инфрақұрылымдық жобаларды, жылжымайтын мүлік пен шикізат активтерін токендеуді осы бағыттағы негізгі құралдардың бірі ретінде атады. Оның айтуынша, мұндай тетік инвесторлардың цифрлық үлестерді қаржыландыруы арқылы қосымша қаражат тартуға мүмкіндік береді.
«Яғни салынып жатқан кез келген ғимаратты немесе жобаны инвесторлар қаржыландыра алатын цифрлық үлестерге бөлуге болады. Кез келген адам осындай акционер бола алады», — деді Олжас Бектенов.
Үкімет басшысы цифрлық активтер мен жаңа қаржы құралдарын елдің бірыңғай қаржы-технологиялық жүйесіне енгізу қажеттігін айтты.
Басым активтердің тізімін анықтаумен қатар, бұл тетіктің нақты жұмыс тәртібін бекітіп, жасалатын мәмілелердің қауіпсіздігін қамтамасыз ету қажет.
