Талдықорғанда магистральдық жылу желілерін реконструкциялау жөніндегі мемлекеттік инвестициялық жоба аясында жұмыстардың құны негізсіз көтерілген. Прокуратура жүргізген тексеру нәтижесінде бюджет қаражатының 85,1 млн теңгесін орынсыз жұмсаудың алды алынды.
Талдықорған қаласының прокуратурасы жоба бойынша сметалық құжаттаманы зерделеу барысында асфальтбетон жабынын кесіп алып, шығару көлемін есептеуде қате кеткенін анықтады.
Құжаттарда шығарылуы тиіс асфальтбетон қалдықтарының салмағы 105 474 тонна деп көрсетілген. Алайда нақты көлемі 5 273,7 тоннаны құраған. Яғни көрсеткіш шамамен 20 есеге артық есептелген.
Прокурорлық қадағалау актісі қаралғаннан кейін шарттың құны қайта қаралып, 85,1 млн теңгеге төмендетілді. Осылайша аталған қаражаттың негізсіз жұмсалуына жол берілмеді.
Жалпы Жетісу облысында прокурорлық ден қою шараларының нәтижесінде бюджет қаражатының 1,2 млрд теңгеден астамын негізсіз жұмсаудың алды алынған.
