Ұлттық экономика бірінші вице-министрі Азамат Әмрин брифинг барысында алдағы жылдары Қазақстан экономикасының өсуін қамтамасыз ететін негізгі бағыттарды атады.
Оның айтуынша, экономикалық өсімнің басты қозғаушы күші өңдеу өнеркәсібі болмақ. Бұл бағытқа шикізатты терең өңдеу, құрылыс материалдарын өндіру, химия өнеркәсібі және азық-түлік шығару кіреді.
«Басты бағыт — өңдеу саласы. Яғни терең өңдеу, құрылыс материалдарын өндіру, химия өнеркәсібі, азық-түлік өндірісі және құрылыс», — деді Азамат Әмрин.
Ол 2029 жылы құрылыс саласындағы өсім шамамен 17%-ды, металлургияда 16–17%-ды, ал көлік саласында 10%-ға жуық көрсеткішті құрайтынын айтты.
Бірінші вице-министрдің сөзінше, ел экономикасындағы өсім көздері де өзгеріп келеді. Бұған дейін негізгі рөлді шикізат өндіретін салалар атқарса, енді басымдық шикізаттық емес секторға беріледі.
«Бұрын негізгі бағыт өндіруші, яғни шикізаттық сала болса, қазір керісінше — шикізаттық емес сектор алға шығып отыр», — деді ол.
