Қаржы вице-министрі Абзал Бейсенбекұлы Қазақстан Халық Кеңесі мүшелеріне төленетін қаражаттың нақты көлемін жарияламады.
Оның айтуынша, төлемдер еңбекақы төлеудің бірыңғай жүйесіне сәйкес жүргізіледі. Алайда бұл жүйе қызметтік пайдалануға арналған ақпарат болғандықтан, әр мүшеге қанша қаражат төленетінін нақтылау мүмкін емес.
«Барлығы еңбекақы төлеудің бірыңғай жүйесіне сәйкес алады. Жүйенің өзі қызметтік пайдалануға арналған. Сондықтан кімнің қанша алатынын егжей-тегжейлі жариялап, нақты соманы атауға мүмкіндігім жоқ», — деді Абзал Бейсенбекұлы.
Сонымен қатар 2027 жылға арналған бюджет жобасында Қазақстан Халық Кеңесін құруға 1,7 млрд теңге қарастырылған. Қаражат Президент бастамаларын іске асыруға арналған 470 млрд теңгелік резервтен бөлінбек.
Жалпы 2027 жылы қауіпсіздікке, мемлекеттік басқаруға және резервтерге 4,9 трлн теңге бағыттау жоспарланған. Оның 3,3 трлн теңгесі күштік құрылымдарға, тағы 787 млрд теңгесі мемлекеттік басқаруға қарастырылған.
Вице-министрдің мәліметінше, мемлекеттік органдар бастапқыда 2027 жылға 36,9 трлн теңге сұратқан. Бюджетті қайта қарау нәтижесінде шығыстар 30,2 трлн теңгеге дейін қысқартылды. Бұл бастапқы өтінімдерден 6,7 трлн теңгеге аз.
