2026 жылғы шілдеден бастап Қазақстан азаматтары Индонезияға визасыз кіре алады. Ел аумағында, соның ішінде Бали аралында 30 күнге дейін болуға рұқсат етіледі, деп хабарлайды SHYNDYK.KZ Қазақстан Сыртқы істер министрлігіне сілтеме жасап.
Визасыз кіру тегін және елге бір рет баруға мүмкіндік береді. Рұқсат етілген мерзім Индонезияға келген күннен бастап есептеледі.
Саяхатшылар шетелден келушілерге арналған бірыңғай электрондық декларацияны да толтыруы керек. Оны сапарға дейін алдын ала әрі тегін рәсімдеуге болады.
Сыртқы істер министрлігі сапар алдында Индонезияға кірудің қолданыстағы талаптарын нақтылап, елдің көші-қон ережелерін сақтауға кеңес берді.
