Қайғылы оқиға 2025 жылғы 2 қарашаға қараған түні Түлкібас ауданында болды. Бетперде киген қарулы адамдар төрт жігітке оқ жаудырған. Соның салдарынан Төрехан Төреәлі қаза тауып, тағы үш адам жараланды.
Сотта айтылған мәлімет бойынша, шабуылдаушылардың көздегені Төрехан емес, басқа адам болған. Ал жасөспірім сол сәтте дәріханадан шығып келе жатқан.
Марқұмның жақындары да Төреханның бұған дейінгі жанжалға еш қатысы болмағанын айтады. Сол түні ол ағасымен бірге дәрі алуға шыққан.
Іс бойынша алты адам сот алдына келді. Негізгі айыпталушы қылмысты қайталап жасағаны ескеріліп, 20 жылға бас бостандығынан айырылды. Тағы екі адамға 18 жылдан түрме жазасы тағайындалды.
Қылмысты жасырған екі сотталушының бірі үш жылға, екіншісі екі жылға бас бостандығынан айырылды.
Тағы бір фигурантқа екі жыл сегіз айға бас бостандығын шектеу жазасы берілді. Алайда оған рақымшылық жасалып, сот залынан босатылды.
Бұл іске барлығы жеті адам қатысы бар деп танылған. Олардың алтауының ісі сотқа жетсе, тағы бір күдікті әлі іздеуде жүр.
Төреханның отбасы оның табылып, жауапқа тартылғанын талап етіп отыр. Сондай-ақ жақындары сотталушылардың біріне рақымшылық жасалып, босатылғанына наразы.
