Анутин Чарнвиракул бұл мәселені 17 қыркүйекте өңір басшыларымен өткен жиында көтерді. Ол жергілікті билікке заңсыз жұмыс істейтін, кәсіпті өзге адамның атына рәсімдейтін және елдегі талаптарды бұзатын шетел азаматтарына қатысты шараны күшейтуді тапсырды.
«Өлуге келсеңіздер, өз елдеріңізге қайтыңыздар»
Премьер-министр шетелдіктерге арналған жеке зират ашу мәселесіне тоқталып, мұндай бастамаларға қарсы екенін ашық айтты.
«Егер өлуге келсеңіздер, өз елдеріңізге барып өліңіздер. Мұнда өлудің қажеті жоқ», — деді Чарнвиракул.
Ол шетел азаматтарының Таиландқа заңды түрде келіп, жұмыс істеп, табыс табуына ешкім кедергі келтірмейтінін, алайда елдің заңдары мен жергілікті тәртіп сақталуға тиіс екенін айтты.
Үкімет басшысы рұқсатсыз діни мақсатта пайдаланылатын нысандар мәселесін де көтерді. Оның сөзінше, құжат жүзінде мейрамхана ретінде тіркеліп, іс жүзінде басқа мақсатта жұмыс істейтін орындарға жергілікті билік назар аударуы керек.
Заң бұзғандар елден шығарылуы мүмкін
Өңір басшыларына шетелдіктердің заңсыз кәсіп жүргізуі, жұмыс істеуге рұқсатсыз еңбек етуі, жергілікті азаматтарды жалған меншік иесі ретінде пайдалануы және жерге қатысты заң талаптарын бұзуы секілді жағдайларды қатаң бақылау тапсырылды.
Заңда негіз болса, мұндай азаматтарды елден шығару мәселесін созбау қажеттігі де айтылды.
Сонымен қатар Чарнвиракул бұл талаптардың барлық шетелдікке бірдей бағытталмағанын атап өтті. Таиланд заңын сақтап, жергілікті мәдениет пен салт-дәстүрге құрметпен қарайтын туристер, инвесторлар және елде заңды түрде тұратын шетелдіктер үшін мемлекет бұрынғыдай ашық екенін жеткізді.
