Негізгі мәселелердің бірі атаулы әлеуметтік көмекке көшу болды. Алғашқы кезеңде 36 төлем түрінің 14-ін беру шарттары қайта қаралады. Кейін әкімдіктер ұсынатын 13 қолдау түрін азаматтардың мұқтаждық деңгейіне қарай төрт түрге біріктіру жоспарланған. Өзгерістер «Цифрлық отбасы картасында» әл-ауқаты жоғары санатқа жатқызылған азаматтарға қатысты болады. Жаңа талаптар туралы тұрғындарға 1 қазаннан бастап SMS, eGov Mobile және банк қосымшалары арқылы кезең-кезеңімен хабарланады. Тиісті заңнамалық түзетулер Құрылтайдың қарауына енгізіледі.
Есту қабілеті бұзылған балаларға медициналық көмек көрсету мәселесіне де назар аударылды. Денсаулық сақтау министрлігінің мәліметінше, диспансерлік есепте алты мыңнан астам бала тұр. Жергілікті кәсіпорындарды тартып, қажетті технологияларды беру арқылы отандық есту аппараттарын шығарудың жол картасын әзірлеу тапсырылды. Өндіріс іске қосылғанға дейін жабдықтарды сатып алуды әкімдіктер қаржыландыруға тиіс. Сондай-ақ 2026 жылы кепілдендірілген тегін медициналық көмек көлеміне 1,6 трлн теңге, ал МӘМС жүйесіне 1,7 трлн теңге қарастырылғаны айтылды.
Абаттандыру мәселелері «Таза Қазақстан» бастамасы аясында қаралды. Акция басталғалы шамамен 10 мың қоқыс орны жойылып, 7 млн ағаш отырғызылған және екі мыңнан астам волонтерлік жоба жүзеге асырылған. Енді жауапты ведомстволар көгалдандыру, елді мекендер мен табиғи аумақтарды күтіп ұстау, экологиялық ағарту және волонтерлік қызмет талаптарын біріктіретін Ұлттық тазалық стандартын әзірлейді. Жыл басынан бері экологиялық акцияларға екі миллионға жуық жас қатысқан.
Вандализммен күрес шаралары да күшейтіледі. Ішкі істер министрлігінің дерегінше, волонтерлермен бірлесіп есірткі жарнамасына қатысты 80 мыңға жуық жазу мен сурет өшірілген. Оларды насихаттау және жарнамалау фактілері бойынша 81 қылмыстық іс қозғалып, 19 адам сотталған. Министрлік қоғамдық орындарға зиян келтіретін граффитиге тыйым салуды және мұндай әрекеттер үшін әкімшілік жауапкершілікті көздейтін заңнамалық түзетулер дайындайды.
Құрылыс пен жол сапасын арттыруға да ерекше көңіл бөлінеді. Қазір республикалық маңызы бар жолдардың 94%-ы, облыстық және аудандық жолдардың 91%-ы, елді мекендер көшелерінің 71%-ы нормативтік талаптарға сәйкес келеді. Жолдардың жағдайына қатысты азаматтар өтініштерінің 58%-ы жергілікті жолдарға байланысты. Құрылыс нысандарына бақылауды күшейту, жұмыс мерзімінің бұзылуына жол бермеу және міндеттемелерін тиісінше орындамаған мердігерлерге қатаң шара қолдану тапсырылды. Қала көшелері мен қоғамдық кеңістіктерді дамыту кезінде Астана урбанистика орталығының тәжірибесі ескеріледі.
Тапсырмалардың орындалуын үйлестіру бірінші вице-премьер Нұрлыбек Нәлібаевқа жүктелді.
