Депутаттар бұл мәселені 2025 жылғы 19 қарашада көтерген еді. Олар ақылы тұрақ аймақтарының орталық көшелермен шектелмей, тұрғын аудандарда да көбейгеніне назар аударды. Соның салдарынан көлік иелері өз үйінің маңына көлік қойғаны үшін де ақы төлеуге мәжбүр болды.
Жаңа ережелерге сәйкес, Алматы тұрғыны мекенжайынан 500 метрге дейінгі аумақта бір автокөлікті тегін қоя алады. Алайда көлік иесіне нақты бір тұрақ орны бекітілмейді. Рұқсат белгіленген аумақтағы тұрақтарды пайдалануға мүмкіндік береді.
«Ақ жол» ҚДП депутаттық сауалында төлем тәсілдерін таңдау мүмкіндігінің шектеулі екені де айтылған. Көптеген тұрақта төлемді тек мобильді қосымша немесе QR-код арқылы жасауға болады. Интернет болмаған, қосымша істен шыққан немесе банк картасына қатысты мәселе туындаған жағдайда жүргізуші айыппұл алуы мүмкін. Ал қолма-қол төлем қабылдайтын паркоматтар көптеген жерде жоқ.
Депутаттар тұрақ операторларының жұмысы мен қаржы қозғалысының ашықтығына да қатысты сын айтты. Сауалда ақылы тұрақтар арқылы жыл сайын миллиардтаған теңге жиналатыны, алайда бюджетке түскен кіріс пен қаражаттың жұмсалуы туралы ақпарат қоғамға жеткілікті деңгейде ашық болмағаны көрсетілді.
Тұрғындарға тегін тұрақ ұсынумен қатар, «Ақ жол» ҚДП жұмыс орны бойынша жеңілдетілген тариф енгізуді, қолма-қол төлем мүмкіндігін қайтаруды, тұрақ аймақтарын бейнекамералармен жабдықтауды, операторлардың әкімдіктермен жасасқан шарттарын жариялауды және олардың қызметіне аудит жүргізуді ұсынған.
Партия өкілдері Алматының жаңа ережелері мен Астанадағы тұрақ жүйесінің қала меншігіне өтуін депутаттар көтерген мәселенің нақты нәтижесі деп есептейді.
