Оқиға сәуір айында көпқабатты тұрғын үйде болған және ішінара бейнебақылау камераларына түсіп қалған. Ер адам оқушы қызбен көрші тұрған. Іс материалдарына сәйкес, ол қызға шоколад ұсынып, артынан лифтіге кірген. Сол жерде балаға ақша бермек болып, өзімен бірге жүруге үгіттеген.
Қыз келіспей, лифтіден жүгіріп шыққан. Ер адам оның соңынан қуып жетіп, құшақтап, тиісе бастаған. Оқушы оның қолынан босап шығып, баспалдақпен жоғары қарай жүгірген.
Бала тоғызыншы қабатқа жетіп, ересектерден көмек сұрау үшін пәтерлердің есігін қаға бастаған. Қыздың анасының айтуынша, ер адам оның соңынан баруын тоқтатпаған. Пәтерлердің бірінен тұрғын шыққаннан кейін ғана қудалау тоқтаған.
Жәбірленуші тараптың адвокаты ер адамның кейбір әрекеттері камераларға түсіп қалғанын айтты. Сонымен қатар қыздың өзі болған оқиға туралы жауап берген. Қорғаушының сөзінше, сотталушы кінәсін толық мойындамаған және жасаған ісіне өкінбеген.
Оқиғадан кейін отбасының қалыпты өмірін өзгертуіне тура келген. Оқушының анасы қазір қызының жағдайы тұрақты екенін, алайда оның ер адамдардан қорқатын болғанын айтты. Туыстары басқа жерге көшіп, баланы өзге мектепке ауыстыру туралы шешім қабылдаған.
Іс алғаш қаралған кезде ер адамға 216 мың теңге айыппұл салынған. Қыздың отбасы үкімге шағымданғаннан кейін жаза қайта қаралды.
Нәтижесінде ер адам жеті жыл алты айға бас бостандығынан айырылды. Сонымен бірге оған педагогикалық қызметпен және кәмелетке толмағандармен байланысты салаларда өмір бойы жұмыс істеуге тыйым салынды.
Сотталған адамның II топтағы мүгедектігі бар. Жұбайы қайтыс болғаннан кейін ол кәмелетке толмаған балаларын жалғыз тәрбиелеген. Әкесінің түрмеге қамалуына байланысты балаларды білім беру органдарының қамқорлығына беру туралы шешім қабылданды.
