Форум қатысушылары алдында сөз сөйлеген Еспаева жеке оқиғасымен бөлісті. Оның айтуынша, көпшілік оны саясаткер және банк саласында 34 жыл еңбек еткен маман ретінде таниды. Алайда еңбек кітапшасындағы алғашқы жазба туралы білетіндер аз.
«Менің еңбек кітапшамдағы алғашқы мамандығым сылақшы-сырлаушы екенін көп адам біле бермейді», — деді ол.
Еспаева кәсіби жетістіктің артында әрдайым үлкен еңбек пен жеке шектеулер тұратынын атап өтті.
Оның айтуынша, жетістікке жету үшін уақыт жұмсап, қалыптасқан жайлылықтан бас тартуға және қиындықтарды еңсеруге дайын болу қажет.
«Әрбір табысты адамның жетістігінің екінші жағы бар. Біз ол үшін немен төлейміз? Жеке уақытымызбен, жайлылығымызбен төлейміз. Біз жайлылық аймағынан шығамыз», — деді Еспаева.
Ол өз тәжірибесін «Нөлден мүмкіндікке дейін» панельдік сессиясында баяндады.
Кездесу кәсіпкер әйелдерді, басшылар мен сарапшыларды біріктірген «Ұмай» форумы аясында өтті. Қатысушылар жеке бизнесті дамыту, қаржылық сауаттылық, баспана сатып алу және жаңа жобаларға серіктестер табу мәселелерін талқылады.
«Ұмай» тұрғын үй бағдарламасына да ерекше назар аударылды. Отбасы банк мамандары әйелдерге ипотекалық несие шарттары мен баспана сатып алу мүмкіндіктері жөнінде кеңес берді.
Еспаева тәжірибе алмасуға және өз идеясын жүзеге асыруға ұмтылған әйелдерді қолдауға мүмкіндік беретін мұндай кездесулердің маңызын атап өтіп, ұйымдастырушыларға алғыс айтты.
«Ақ жол» партиясы үшін әйелдер кәсіпкерлігін дамыту шағын және орта бизнесті қолдаудың негізгі бағыттарының бірі болып қала береді.
Қаржыландыруға, білімге және кәсіби байланыстарға қол жеткізу әйелдерге жеке кәсібін ашуға, жаңа жұмыс орындарын құруға және қаржылық дербестігін нығайтуға мүмкіндік береді.
