SpaceX компаниясының Starship ғарыш кемесі алғаш рет Жер орбитасына шықты. Бұл жүйенің 14-ші сынақ ұшырылымы болды. Бұған дейінгі сынақтардың барлығы суборбиталық траектория бойынша өткен.
Starship АҚШ-тың Техас штатындағы Starbase ғарыш айлағынан ұшырылды. Көтерілу кезінде қозғалтқыштардың бірінде ақау пайда болғанымен, кеме ұшуын жалғастырып, жарты сағатқа жетпей орбитаға шықты.
Starship бортында жаңа буындағы 26 Starlink V3 жерсерігі болған. Орбитаға шыққаннан кейін SpaceX оларды ғарышқа сәтті орналастырды.
Бастапқы жоспар бойынша Starship орбитада шамамен 10 сағат болып, Жерді алты рет айналып шығуы керек еді. Алайда SpaceX сынақ ұшуын жоспарланған уақыттан ерте аяқтау туралы шешім қабылдады. Кеме ұшырылғаннан кейін шамамен үш сағаттан соң Жерге оралды.
Starship Тынық мұхитына қонғаннан кейін кемеде қатты өрт шықты. Жарияланған кадрлардан жарылысқа ұқсас күшті жарқылды да байқауға болады.
Осыған қарамастан, SpaceX сынақты сәтті өтті деп бағалады. Компания үшін негізгі нәтиже — Starship-тің алғаш рет Жер орбитасына шығуы және Starlink жерсеріктерін сәтті орналастыруы.
Starship — SpaceX әзірлеп жатқан қайта пайдалануға болатын ғарыш жүйесі. Ол Жер орбитасына адам мен жүк тасымалдауға, ал болашақта Ай мен Марсқа ұшуға арналған.
