Президент Қасым-Жомарт Тоқаев цифрлық инновациялар мен жасанды интеллект саласында қазақ-герман серіктестігін жолға қою екі ел ынтымақтастығының басым бағыттарының бірі екенін айтты.
Қазақстан неміс компанияларын деректерді өңдеу орталықтарына арналған технологиялар, энергия тиімділігі, бұлтты инфрақұрылым және киберқауіпсіздік бағытындағы жобаларға қатысуға шақырды.
Президент финтех саласына да тоқталды. Оның айтуынша, Қазақстандағы дамыған цифрлық қаржы жүйесі жаңа төлем шешімдері мен токенизация технологияларын бірлесіп әзірлеп, кейін оларды Орталық Азия нарығына шығаруға мүмкіндік береді.
Тоқаев Alatau City жобасын екі елдің ынтымақтастығын кеңейтетін тағы бір маңызды алаң ретінде атады. Жоба неміс қаржы секторының Қазақстан экономикасына кеңінен қатысуына жол ашуы мүмкін.
Alatau City цифрлық дәуірдің талаптары ескеріле отырып жобаланған Орталық Азиядағы алғашқы «ақылды қала» ретінде дамытылмақ. Президенттің пікірінше, жаңа қала Германияның институционалдық капиталын Қазақстандағы инвестициялық мүмкіндіктермен ұштастырып, технология, білікті мамандар мен бизнес шоғырланатын орталыққа айнала алады.
Мемлекет басшысы Қазақстан мен Германия арасындағы серіктестік тек инвестиция тартумен шектелмеуі керектігін айтты. Негізгі мақсат — жаңа өндіріс салаларын қалыптастырып, экономиканың ұзақ мерзімді өсуіне негіз болатын бағыттарды дамыту.
Тоқаев Қазақстан инвесторларға қолайлы әрі тұрақты жағдай жасап, олардың құқықтарын қорғауды және стратегиялық маңызы бар жобаларды қолдауды жалғастыратынын мәлімдеді.
