Израиль тарапының алдын ала бағалауынша, ұшқыштардың бірі әуе кемесін басқаруды әдейі басып алып, оны құлатуға әрекеттенген. Израиль бұл әрекеттің мақсаты жолаушылар мен экипаж мүшелерін қазаға ұшырату болуы мүмкін деп есептейді. Алайда түпкілікті қорытындыны тергеу жасауы тиіс.
Бортында негізінен Израиль азаматтары болған ұшақ бағытын өзгертіп, Сауд Арабиясының Табук қаласына шұғыл қонды.
Мәлімдемеде жолаушылардың әрекетіне ерекше назар аударылды. Израиль тарапының нұсқасы бойынша, шабуыл кезінде олар жағдайға араласып, ұшқыштар кабинасына кіріп, шабуыл жасаған адамды залалсыздандыруға көмектескен. Елшіліктің пікірінше, жолаушылар мен экипаждың әрекеті көптеген адамның өмірін қиюы мүмкін апаттың алдын алған.
Израиль болған жағдайды ұшақтағы адамдарға жасалған шабуыл ғана емес, Біріккен Араб Әмірліктерімен арадағы қатынастарға және Авраам келісімдеріне бағытталған соққы деп те бағалады.
Бұған дейін SHYNDYK.KZ 30 қыркүйекте FZ1073 рейсін орындаған Boeing 737 MAX әуе кемесі алдымен 7700, кейін бортқа ықтимал заңсыз араласу кезінде қолданылатын 7500 апаттық кодын бергенін хабарлаған. Осыдан кейін ұшақ биіктігін күрт жоғалтып, Сауд Арабиясына бағытталды.
Халықаралық БАҚ мәліметінше, ұшқыштар кабинасында жанжал болып, ұшқыштардың бірі пышақ жарақатын алған. Жағдайға жолаушылар мен экипаждың басқа мүшелері араласқан. Ұшақ қауіпсіз қондырылып, жолаушылар аман қалды.
Болжамды шабуыл жасаушының мотиві ресми түрде әлі анықталған жоқ. Тергеу жалғасып жатыр.
