Бұл туралы Путин 1 қазанда «Валдай» халықаралық пікірталас клубының отырысында айтты.
Талқыланған ұсынысқа сәйкес, Украина Ресейдегі мұнай өңдеу зауыттарына шабуыл жасамауы керек. Ал Ресей Украинаға тиесілі кемелерге соққы жасауды тоқтатуы тиіс болған.
Путин мұндай шарт Ресей үшін тиімсіз екенін айтып, ұсынысты «ақылға қонбайтын» деп атады. Кейін одан бұл бастаманы қабылдауға дайын ба деп нақты сұрағанда, Ресей президенті «жоқ» деп жауап берді.
Сонымен бірге Путин Украина шабуылдарының Ресей мұнай өңдеу саласына әсер еткенін мойындады. Оның есебінше, мұнай өңдеу зауыттарына жасалған соққылардан келген экономикалық шығын елдің жалпы ішкі өнімінің шамамен 1 пайызына тең.
Ресей президенті бұған жауап ретінде Украина экономикасы үшін маңызды нысандарға соққы жасалғанын айтты. Оның мәлімдеуінше, соның салдарынан Украина металлургия саласындағы өндірістік мүмкіндіктерінің елеулі бөлігін жоғалтқан. Бұл — Ресей тарапының мәлімдемесі.
Путин Ресейде дизель отыны жеткілікті екенін де айтты. Оның сөзінше, Украина ресейлік мұнай өңдеу зауыттарына шабуылды тоқтатқан күннің өзінде, санкциялар сақталған жағдайда Ресей жанармайды әлемдік нарыққа еркін шығара алмайды. Сондықтан Мәскеудің жауап соққыларынан бас тартуына негіз жоқ деп есептейтінін жеткізді.
Айта кетейік, Ресей мен Украина энергетикалық және мұнай инфрақұрылымына соққыларды жалғастырып келеді. Киев Ресейдің мұнай өңдеу кәсіпорындарын нысанаға алса, Мәскеу Украинадағы энергетикалық және басқа да инфрақұрылым нысандарына шабуыл жасап жүр.
