Қазығұрт ауданы әкімдігінің мәліметінше, 1 қазанда жауын-шашынның күшеюінен бірнеше ауылға сел жүрген.
Табиғи апаттың салдары түсірілген видеолар әлеуметтік желіде де тарады. Кадрлардан көшелермен лай су ағып, кейбір аумақтарды басқанын көруге болады.
Қазір зардап шеккен елді мекендерде жергілікті атқарушы органдар мен төтенше жағдайлар қызметінің мамандары жұмыс істеп жатыр.
Негізгі күш су басқан аумақтарды тазартуға бағытталған. Мамандар лай мен қоқысты шығарып, бүлінген жерлерді қалпына келтіру жұмыстарын жүргізуде. Тұрғындардың қауіпсіздігін қамтамасыз ету шаралары да қолға алынған.
Аудан әкімдігінің соңғы мәліметі бойынша, апат салдарын жоюға 200-ден астам адам және 12 арнайы техника тартылған. Мамандар күшейтілген режимде жұмыс істеп, зардап шеккен аумақтарды кезең-кезеңімен тазалап жатыр.
Бұған дейін оқиға орнына 64 адам мен тоғыз техника жұмылдырылғаны хабарланған еді. Кейін жұмыс көлеміне байланысты күш пен техника саны артты.
Алдын ала мәлімет бойынша, адам шығыны жоқ. Тұрғын үйлердің қирағаны да тіркелмеген.
Қазіргі таңда Қазығұрт ауданында қалпына келтіру жұмыстары жалғасып жатыр.
