Ермұхамбетованың айтуынша, Қазақстанда әйелдердің білім алып, қызметте өсуі бала туу көрсеткішінің күрт төмендеуіне әкелген жоқ. Ол бұған декреттік және бала күтіміне байланысты төлемдердің де ықпалы бар деп есептейді.
Мұндай қолдау бала дүниеге келгеннен кейін отбасы табысының күрт азайып кетпеуіне көмектеседі. Сондай-ақ әйелдің бірнеше жылға табыссыз қалу қаупін азайтады.
Алайда 2027 жылдан бастап әлеуметтік қолдау жүйесіне өзгеріс енгізу жоспарланып отыр. Бірқатар төлемді тағайындау кезінде отбасының материалдық жағдайы ескеріледі. Мұқтаждық деңгейін анықтауда Отбасының цифрлық картасындағы мәліметтер пайдаланылмақ.
Ғалымның пікірінше, бұл өзгерістің салдарын ең алдымен орташа табысы бар қалалық отбасылар сезінуі мүмкін. Қағаз жүзінде мұндай отбасы аз қамтылғандар қатарына кірмегенімен, табысының едәуір бөлігін ипотекаға, пәтерақыға, несиеге, балабақшаға және күнделікті шығындарға жұмсайды.
Әсіресе Астана мен Алматы сияқты өмір сүру құны жоғары қалаларда жәрдемақының азаюы немесе одан айырылу бала сүю туралы шешімге әсер етуі мүмкін.
Ермұхамбетованың сөзінше, мұндай жағдайда кей әйелдер екінші немесе үшінші баланы дүниеге әкелуді кейінге қалдыруы, ал кейбірі көпбалалы болудан мүлде бас тартуы ықтимал. Бұл әсіресе тұрақты жұмысы мен мансабы бар әйелдер үшін өзекті.
Тағы бір мәселе — декреттен ерте шығуға мәжбүр болу. Ғалым отбасының қаржылық жағдайы мүмкіндік бермесе, аналар жұмысқа жоспарлағаннан ерте оралуы мүмкін екенін айтады. Бұл бала күтіміне де, отбасыға түсетін жалпы салмаққа да әсер етуі ықтимал.
Осыған байланысты Ермұхамбетова әлеуметтік шығынды қысқартудың ұзақ мерзімді салдарын да ескеру қажет деп санайды. Оның пікірінше, бүгін төлемнен үнемделген қаржы ертең бала туу көрсеткішінің төмендеуі сияқты әлдеқайда күрделі мәселеге ұласуы мүмкін.
Бұған дейін SHYNDYK.KZ Қазақстанда әлеуметтік қолдауды атаулы түрде көрсету жүйесіне көшу жоспарланып отырғанын жазған еді. Алғашқы кезеңде өзгеріс 36 төлемнің 14 түріне қатысты болмақ. Отбасының әлеуметтік жағдайы Отбасының цифрлық картасындағы деректер арқылы бағаланады.
