«Азаматтарға арналған үкімет» КЕАҚ филиалы директорының бұрынғы орынбасары А.А. Рахымжанов пен Д.М. Нұртазин Ұлан ауданындағы Шыбынды учаскесінде алтынды заңсыз өндіру ісін ұйымдастырған.
Бұл мақсатта олар өздеріне бағынысты және тек барлау жұмыстарына ғана лицензиясы бар компанияны пайдаланған. Алайда іс жүзінде аталған аумақта кәдімгідей қазба жұмыстары жүргізіліп, экскаваторлар, тиегіштер, жүк көліктері мен алтын шаятын құрылғылар тоқтаусыз жұмыс істеп тұрған.
Мұның нәтижесінде құны 844 миллион теңгеден асатын 15 келіден астам алтын заңсыз өндірілді. Сондай-ақ сомасы 382 миллион теңгеге бағаланған тағы 6,7 келі алтын мен 579 грамм күміс тәркіленді.
Кен қазу барысында 18,2 гектар жер бүлініп, мемлекеттік орман қорына тиесілі ағаштар мен бұталар кесілген әрі зақымдалған. Тек экологиялық шығынды қалпына келтірудің өзіне 300 миллион теңгеден астам қаражат қажет болады.
Сот айыпталушылардың 372 миллион теңгелік мүлкін тәркіледі. Оның ішінде төрт жүк көлігі, екі экскаватор, екі тиегіш, гидрожүріс құрылғысы, сондай-ақ 10 миллион теңге мен 56 мың доллар көлеміндегі қолма-қол ақша бар.
Іске қатысы бар қос азамат та 4 жылдан бас бостандығынан айырылды.
Үкім әлі заңды күшіне енген жоқ.
