Қасым-Жомарт Тоқаев Оман Сұлтанын Қазақстанда қарсы алып, бұл оның Сұлтан ретінде Орталық Азияға жасаған алғашқы сапары екенін атап өтті.
Президент Оманды Қазақстанның араб әлеміндегі уақыт сынынан өткен сенімді серіктесі деп атады. Келесі жылы екі ел арасында дипломатиялық қарым-қатынас орнағанына 35 жыл толады.
Келіссөз қорытындысы бойынша Қазақстан мен Оман энергетика, көлік және логистика, ауыл шаруашылығы, IT және цифрландыру, денсаулық сақтау және басқа да бағыттар бойынша бірқатар екіжақты келісімге қол қояды.
Сондай-ақ екі ел арасындағы серіктестіктің басым бағыттарын айқындайтын Бірлескен мәлімдеме қабылдау жоспарланып отыр.
Қасым-Жомарт Тоқаев Қазақстан мен Оман бірлесіп жүзеге асырып жатқан жобаларға да тоқталды. Олардың қатарында Доңға мұнай кен орнын игеру, Павлодар және Солтүстік Қазақстан облыстарындағы Solidcore Resources кәсіпорындары, Oman Investment Authority-мен құрылған бірлескен инвестициялық қор, сондай-ақ қонақүй және курорттық инфрақұрылымды дамыту жобалары бар.
Қасым-Жомарт Тоқаев келіссөз барысында қол жеткізілген уағдаластықтар Қазақстан мен Оман арасындағы стратегиялық серіктестікті жаңа деңгейге көтеретініне сенім білдірді.
