Бахтияр Мұхаметқалиев Үкіметтегі брифингте жасанды интеллект болашақта шенеуніктердің орнын басуы мүмкін бе деген сұраққа жауап берді.
Оның айтуынша, мемлекет алдында адамдарды технологиямен алмастыру міндеті тұрған жоқ. Негізгі мақсат – жасанды интеллект көмегімен мемлекеттік аппараттың жұмысын жеңілдетіп, тиімділігін арттыру.
Вице-министрдің сөзінше, жаңа технологияларды қолданатын маман сол мүмкіндіктерді пайдаланбайтын қызметкерге қарағанда жұмысты жылдам әрі тиімді атқара алады. Сондықтан жұмыс берушілер де нәтижесі жоғары мамандарға басымдық беруі мүмкін.
Жасанды интеллект мемлекеттік органдардағы ақпаратты жинау мен өңдеу, қажетті мәліметті іздеу, құжаттар мен жауаптардың жобасын әзірлеу секілді жұмыстарды жеделдете алады. Қазір мұндай технология министрліктердің бірінде пилоттық режимде қолданылып жатыр.
Жоспар бойынша жасанды интеллектіні мемлекеттік аппаратқа енгізу арқылы бірқатар процестің тиімділігін 30 пайызға дейін арттыру көзделген. Алайда мемлекеттік органдар құпия және сезімтал ақпаратпен жұмыс істейтіндіктен, ақпараттық қауіпсіздік талаптары да ескерілуі тиіс.
Бахтияр Мұхаметқалиев мамандарды технологияның дамуына ілесіп қана қоймай, жаңа құралдарды меңгеруге және оларды өз жұмысында қолдануға шақырды.
