Президент өз сөзінде Орталық Азия мемлекеттері мен Әзербайжанның тәуелсіздік алғаннан бергі жетістіктеріне тоқталды. Оның айтуынша, соңғы 35 жылда бұл елдер егемендігін нығайтып, өзіндік даму жолын қалыптастырды және халықаралық қоғамдастықтан лайықты орын алды.
«Бүгінде Орталық Азия мен Әзербайжан Еуразиядағы өсім мен геосаяси ықпалдастықтың маңызды орталықтары саналады», – деді Қасым-Жомарт Тоқаев.
Өзара сауда көлемін 7 млрд долларға арттыру көзделіп отыр
Мемлекет басшысы өңір елдері арасындағы сауда-экономикалық ынтымақтастыққа ерекше назар аударды.
Оның мәліметінше, өткен жылы мемлекеттердің өзара сауда айналымы шамамен 13 млрд долларды құраған. Бұл елдердің жалпы сыртқы сауда көлемінің небәрі 8 пайызына тең.
Президент өңірдің экономикалық әлеуетін ескере отырып, аталған көрсеткішті едәуір арттыруға мүмкіндік бар екенін атап өтті.
Осыған байланысты Қасым-Жомарт Тоқаев ел үкіметтеріне бірлескен іс-қимыл жоспарын әзірлеуді тапсыруды ұсынды. Негізгі мақсат – мемлекеттер арасындағы сауда айналымын кемінде 20 млрд долларға жеткізу.
Ұсыныс жүзеге асса, өзара сауда көлемі қазіргі көрсеткішпен салыстырғанда шамамен 7 млрд долларға немесе 54 пайызға ұлғаяды.
Бұл бастама Орталық Азия елдері мен Әзербайжан арасындағы экономикалық әріптестікті кеңейтуге бағытталған.
