Қазақстанның Сыртқы істер министрлігі әлеуметтік желілерде тараған 14 отандасымыз ұрыс қимылдары аймағынан Ресейдегі Қазақстан елшілігіне бүгін жеткізіледі деген ақпаратты жоққа шығарды деп хабарлайды SHYNDYK.KZ.
Ведомство өкілдері бұл мәліметтердің шындыққа сәйкес келмейтінін ресми түрде мәлімдеді. СІМ туыстары туралы кез келген хабарды тағатсыздана күтіп отырған жақындары үшін мұндай қауесеттер ауыр соққы болып тиетінін және негізсіз үміт тудыратынын қадап айтты.
Сонымен бірге министрлік Ресей тарапымен түрлі деңгейдегі келіссөздер мен өзара байланысты тоқтатқан жоқ. Бұл мәселе дипломаттардың тұрақты бақылауында қала береді, ал атқарылған жұмыстардың нақты нәтижелері туралы ресми ақпарат қосымша жарияланатын болады.
Сыртқы саяси ведомство азаматтар мен бұқаралық ақпарат құралдарының өкілдерін тек тексерілген ресми деректерге сүйенуге шақырып, көрінеу жалған ақпарат таратқаны үшін заң алдында жауапкершілік қарастырылғанын тағы бір мәрте еске салды.
