Бұл туралы ҚР Сыртқы істер министрлігінің ресми өкілі Жанболат Үсенов мәлімдеді.
Бұған дейін табиғи апаттан кейін үш қазақстандық әйелмен байланыс үзілгені хабарланған. Олардың екеуі Непалда, біреуі Қытайдың Тибет автономиялық ауданында жоғалды деп есептелген.
Кейін олардың бірінің Қазақстанда екені белгілі болды. Әйел Непалға жоспарлаған сапарынан бас тартып, елден шықпаған.
Ал қалған екі қазақстандықтың қайда екені әлі анықталған жоқ. Олардың туыстары ДНҚ сараптамасын жүргізу үшін биологиялық үлгілер тапсырған. Бұл табиғи апат кезінде табылған мәйіттердің кімге тиесілі екенін анықтау қажет болған жағдайда пайдаланылады.
Қазақстандық дипломаттар жоғалған әйелдердің отбасыларымен байланыста болып, қажетті көмек көрсетіп жатыр.
Непалдағы табиғи апат елге орасан зор шығын әкелді. Reuters агенттігінің мәліметінше, су тасқынынан кемінде 1 455 адам қаза тауып, тағы 5 285 адам із-түзсіз жоғалған. Құтқарушылар 13 795 адамды қауіпсіз жерге көшірген.
Тасқын салдарынан 12 су электр энергетикасы нысаны қирап, жолдар мен көпірлер бүлінген. Елді мекендер мен ауыл шаруашылығы алқаптарына да айтарлықтай зиян келген.
5 қазанда Непал билігі іздестіру-құтқару операциясының аяқталғанын жариялап, қалпына келтіру жұмыстарына кірісті. Соған қарамастан, апат аумағынан табылған адам сүйектері мен жеке заттарды жинау жалғасып жатыр.
Билік із-түзсіз жоғалған адамдарды заң жүзінде қайтыс болды деп тану тәртібін де қарастыруда.
Алдын ала есеп бойынша, табиғи апаттан зардап шеккен аймақтарды қалпына келтіруге және баспанасыз қалған тұрғындарға көмектесуге шамамен 5 миллиард доллар қажет.
Екі қазақстандық әйелді іздестіруге қатысты әзірге жаңа мәлімет жоқ.
