10 қазан күні Шымкентте қазақстандық орындаушы Қайрат Нұртастың концертіне кіреберісте жаппай қыспақ болды. Іс-шараға келген көрермендер түрлі жарақат алғандарын айтып шағымдануда.
Әлеуметтік желілерде тараған ақпаратқа сәйкес, концерт алаңының кіреберісінде бақылаусыз қалған адамдар тобы жиналып, халық бір-бірін қысып тастаған. Куәгерлер оқиға орнынан фото және видео жариялап жатыр. Кейбір жазбаларда жедел жәрдем көлігінің де келгені көрінеді. Желіде көрермендердің бірі: «Адамдар есінен танып жатты», – деп жағдайдың қаншалықты ауыр болғанын жеткізген.
Бұл оқиғадан кейін Freedom Афиша билет операторы ресми мәлімдеме жасап, іс-шарадағы өз рөлін түсіндірді. Компания концертті ұйымдастырушы Show Service компаниясы екенін атап өтті.
«Freedom Афиша ұйымдастырушы бекіткен квота аясында билеттерді сатуды, ал алаңда билеттерді тексеру және білезік тарату бойынша еріктілердің жұмысын ғана қамтамасыз етті. Алаңды дайындау, көрермендерді кіргізуді ұйымдастыру және күзет тарту біздің жауапкершілігімізге кірмейді. Біз оқиғаның барлық мән-жайын барынша объективті және ашық түрде анықтауға мүдделіміз», – делінген хабарламада. Сондай-ақ, оператор зардап шеккендерді немесе оқиға туралы ақпараты бар адамдарды байланысқа шығуға шақырды.
SHYNDYK.KZ редакциясы зардап шеккендердің нақты санын білу және көрермендердің қауіпсіздігін қамтамасыз етпегені үшін іс-шараны ұйымдастырушыға қатысты қандай шаралар қабылданатынын анықтау мақсатында Шымкент қалалық Полиция департаментіне ресми сауал жолдады.
