Алматыдағы көпқабатты үйлердің бірінің тұрғындары полиция мен прокуратураға адам ұрлау және оның жылжымайтын мүлігін заңсыз иемдену фактісін тергеу талабымен жүгінді. Оқиға туралы ақпарат пен бейнебақылау камераларындағы қорқынышты жазбалар әлеуметтік желілерде кеңінен таралып жатыр.
Көршілердің айтуынша, 30 қыркүйекте кіреберістегі камералар ес-түссіз жатқан, басына қап кигізілген ер адамды көтеріп әкетіп бара жатқан белгісіз тұлғаларды түсіріп алған. Бұл оқиғаның алдында пәтер иесіне бөтен адамдардың күдікті түрде жиі келіп жүргені байқалған. Арада он күн өткен соң, 10 қазан күні тұрғындарға жоғалып кеткен көршісінің баспанасы сатылып кеткені белгілі болған.
Алматылықтар өз шағымдарында пәтерді басып алуға «қара риелторлардың» ұйымдасқан тобының қатысы бар деп топшылайды. Оған қоса, жарияланымдарда жергілікті учаскелік инспектор мен нотариусқа қатысты да ашық айыптаулар айтылуда: шағымданушылар оларды қылмыстық схеманың сыбайластары болуы мүмкін деп санайды.
