Король Қазақстанның қарқынды дамып келе жатқанын айтып, Бельгияның Орталық Азия өңіріне қызығушылығы жоғары екенін жеткізді.
«Қазақстан – біз үшін қарқынды дамып келе жатқан өте маңызды ел. Жалпы, Бельгия тұтас Орталық Азия өңіріне айрықша қызығушылықпен қарайды. Бұл өңірдің мәні зор», – деді Филипп.
Ол екі ел арасында 35 жыл ішінде қалыптасқан қарым-қатынасты одан әрі дамытуға мүмкіндік бар екенін айтты.
«Елдеріміз 35 жыл ішінде жақсы қарым-қатынас орнатты. Біз осы тарихи межені бірге атап өтуге ниеттіміз. Сонымен қатар ынтымақтастығымызды жаңа сапалы деңгейге көтеретінімізге сенімдімін», – деді король.
Филипптің айтуынша, Қазақстанға келген Бельгия делегациясының құрамына болашаққа бағытталған түрлі салалардың өкілдері енген.
Король Филипп пен патшайым Матильда Қазақстанның әлеуметтік-экономикалық жетістіктері мен халықаралық беделіне жоғары баға беріп, Мемлекет басшысына жылы қабылдауы үшін алғыс айтты.
«Президент мырза, бізбен бірге жүру үшін жұмыс кестеңізді өзгерткеніңізді білемін. Осы ықыласыңызға тәнтіміз. Сондықтан алтын уақытыңызды бөліп, құрмет көрсеткеніңізді жоғары бағалаймыз», – деді Бельгия королі.
