Ішкі істер министрлігі шетелдіктерге ЖСН беру және бұрын тіркелген мәліметтерді түзету ережесіне өзгерістер әзірледі. Тиісті бұйрық жобасы «Ашық НҚА» порталында жарияланды.
Ұсынысқа сәйкес, ЖСН рәсімдеуге өтініш берген шетел азаматының Қазақстанда болу немесе тұру заңдылығы тексеріледі. Ол үшін иммигранттар туралы эталондық деректер базасындағы мәліметтер пайдаланылады.
Қосымша тексеру ЖСН-ді алғаш рет алатындарға ғана емес, бұрын енгізілген деректерін түзеткісі келетін азаматтарға да қатысты болмақ.
Министрліктің түсіндіруінше, бұл өзгеріс шетелдіктердің Қазақстан аумағында заңды негізде жүргенін анықтауға және мемлекеттік қызмет көрсету кезінде қолданылатын мәліметтердің дұрыстығын арттыруға мүмкіндік береді.
Әзірге жаңа талаптар күшіне енген жоқ. Бұйрық жобасы 2026 жылғы 28 қазанға дейін қоғамдық талқылауда болады. Одан кейін құжат белгіленген тәртіппен қаралады.
