Бұл туралы Премьер-министрдің орынбасары – Ұлттық экономика министрі Серік Жұманғарин Құрылтайдағы брифингте мәлімдеді.
Министрдің айтуынша, сайлауға қажетті қаржыны Орталық сайлау комиссиясы есептейді. Ол үшін сайлау науқанының ұзақтығы мен сайлау учаскелерінің саны анықталуы керек.
«Сайлау науқаны қанша уақытқа созылатыны, сайлау учаскелерінің саны белгілі болғаннан кейін Орталық сайлау комиссиясы қажетті соманы есептейді. Біз бұл қаражатты Үкімет резервінен бөлеміз», – деді Серік Жұманғарин.
Ол Үкімет резервіндегі қаражат қандай мақсаттарға жұмсалатынын да түсіндірді. Атап айтқанда, бұл қаржы төтенше жағдайлар мен апаттардың салдарын жоюға, сондай-ақ жергілікті бюджетінде қаражат жетіспейтін өңірлерге қолдау көрсетуге бағытталады.
Жұманғарин жоспарлы сайлауды өткізуге қажетті шығындар бюджетте алдын ала қарастырылатынын атап өтті. Ал кезектен тыс сайлау ұйымдастырылған жағдайда қаржы Үкімет резервінен бөлінеді.
Осылайша, мәслихат депутаттарының алдағы сайлауына қанша қаражат жұмсалатыны Орталық сайлау комиссиясының есебінен кейін белгілі болады.
