Ақмола облысының Есіл ауданында интернет арқылы букмекерлік кеңселерде ақша тіккен екі мемлекеттік қызметші жұмыстан босатылды. Бұл деректерді прокуратура сыбайлас жемқорлыққа қарсы заңнама талаптарының сақталуын тексеру барысында анықтаған, деп хабарлайды SHYNDYK.KZ.
Облыстық прокуратураның мәліметінше, олардың бірі аудандық дене шынықтыру және спорт бөлімінің басшысы болған. Екіншісі тұрғын үй-коммуналдық шаруашылық, жолаушылар көлігі, автомобиль жолдары және тұрғын үй инспекциясы бөлімінде бас маман қызметін атқарған.
«Прокурорлық қадағалау шараларының нәтижесінде екі лауазымды тұлға да атқарып отырған қызметінен босатылды», – делінген прокуратура хабарламасында.
Қадағалау органы мемлекеттік қызметшілердің заңда белгіленген шектеулер мен тыйымдарды сақтауға міндетті екенін ескертті.
«Мұндай әрбір дерекке құқықтық тұрғыдан қатаң баға беріледі», – деп мәлімдеді прокуратура.
Жұмыстан босатылған шенеуніктердің аты-жөні мен букмекерлік кеңселерде қанша ақшаға бәс тіккені жарияланған жоқ.
