Астанада тұрғын үй кезегінде тұрған азаматтарға ипотеканың бастапқы жарнасын төлеу үшін 1,5 млн теңгеге дейін қаржылай көмек көрсетіледі, деп хабарлайды SHYNDYK.KZ.
Қаражат әкімдік тарапынан тұрғын үй сертификаты түрінде беріледі. Оны қолма-қол алуға немесе басқа мақсатқа жұмсауға болмайды. Сертификат тек ипотекалық несие рәсімдеу кезінде бастапқы жарнаның бір бөлігін өтеуге арналған.
Мемлекеттік қолдауға тұрғын үй кезегінде тұрған мұғалімдер, дәрігерлер, полиция қызметкерлері, құтқарушылар және әлеуметтік осал топқа жататын азаматтар үміткер бола алады. Бұл ретте өтініш берушінің жұмыс орны мен отбасының табысы белгіленген талаптарға сәйкес келуі қажет.
2026 жылы отбасының әр мүшесіне шаққандағы орташа айлық табыс 157 639 теңгеден аспауға тиіс. Есептеу кезінде ерлі-зайыптылардың табысы мен балаларды қоса алғандағы отбасы құрамы ескеріледі.
Биыл елордада 433 тұрғын үй сертификатын беру жоспарланған. Қазіргі уақытта 292 адам осы қолдау шарасын пайдаланған. Өтініштер hc.kezekte.kz порталы арқылы қабылданады.
