Солтүстік Қазақстан облысында медицина мамандары бес көліктің қатысуымен болған сұмдық апаттан зардап шеккендердің жағдайына түсініктеме берді, деп хабарлайды SHYNDYK.KZ.
Дәрігерлердің мәліметінше, Audi автокөлігінің 20 жастағы жүргізушісі қазіргі уақытта Тайынша көпсалалы ауданаралық ауруханасының хирургия бөлімшесінде тиісті ем қабылдауда. Мамандар оның жағдайын тұрақты деп бағалап отыр. Ал екінші зардап шегушінің өмірі үшін реаниматологтар әлі де күресуде.
Еске сала кетейік, қайғылы жол-көлік оқиғасы 15 қазан күні сағат 08:00 шамасында республикалық маңызы бар Астана – Петропавл тасжолында, Кременчуг ауылының маңында болған еді. Құқық қорғау органдарының алдын ала мәліметі бойынша, жолда бірден бес көлік — үш жеңіл автокөлік пен екі КамАЗ жүк көлігі соғылған.
Қатты соққының салдарынан Audi көлігінің үш жолаушысы алған жарақаттарынан оқиға орнында көз жұмды. Бұған дейін бұқаралық ақпарат құралдарында қаза тапқандар білім беру саласының қызметкерлері — жергілікті балабақшаның директоры мен екі тәрбиешісі болғаны туралы бейресми мәліметтер тараған болатын.
